अतुल चेंडके

मुंबई।सोमवारी रात्री (9 डिसेंबर) कुर्ला एलबीएस मार्गावर भीषण अपघात झाला. कुर्ला बस डेपोमधून निघालेली इलेक्ट्रिक बेस्ट बस भरधाव वेगाने गर्दीत घुसल्याने अनेकांना धडक दिली. या अपघातात 5 जण ठार झाले असून 20 जण जखमी झाले आहेत. मृतांची संख्या वाढण्याची शक्यता आहे.

अपघात रात्री 10 वाजून 10 मिनिटांनी घडला.बस क्रमांक 332, जी कुर्लाहून अंधेरीकडे जात होती, तिचा ब्रेक फेल झाला आणि ती बुद्धा कॉलनीमधील आंबेडकर नगर येथे दुर्घटनाग्रस्त झाली.100 मीटर अंतरावर असलेल्या 30-40 वाहनांना बसने धडक दिली.बस सोसायटीच्या गेटला धडकून थांबली.अपघाताची कारणे आणि परिणाम:बसचा चालक मद्यधुंद अवस्थेत होता, असा स्थानिक नागरिकांचा आरोप आहे.बसखाली चिरडलेल्या नागरिकांमुळे मृतांचा आकडा वाढण्याची शक्यता वर्तवली जात आहे.20 जण गंभीर जखमी, त्यापैकी काहींची प्रकृती चिंताजनक आहे.पोलिसांनी तात्काळ घटनास्थळी पोहोचून जखमींना सायन आणि भाभा रुग्णालयात दाखल केले.स्थानिक आमदार मंगेश कुडाळकर यांनी दिलेल्या माहितीनुसार, पोलिसांनाही अपघातात दुखापत झाली आहे.वर्दळीच्या बाजार परिसरात झालेल्या या अपघातामुळे गोंधळाचे वातावरण निर्माण झाले.मार्केटमध्ये गर्दीत घुसलेल्या बसमुळे नागरिकांमध्ये भीतीचे वातावरण आहे.पोलिसांकडून बस चालकावर गुन्हा दाखल करण्याची प्रक्रिया सुरू आहे. तसेच, प्रशासनाकडून मृतांच्या कुटुंबांना मदत आणि जखमींना योग्य वैद्यकीय उपचार मिळावेत यासाठी प्रयत्न सुरू आहेत.

(ही बातमी पुढील अपडेट्ससाठी सुधारित केली जाईल.)