नवी मुंबई । पनवेल रेल्वे स्टेशनजवळील एका पडीक गोडावूनमध्ये कुजलेल्या अवस्थेत सापडलेल्या एका अनोळखी इसमाच्या हत्येप्रकरणी गुन्हे शाखा कक्ष 2, पनवेल यांनी अज्ञात मारेकऱ्याला अटक केली आहे.

मृतदेह 16 सप्टेंबर रोजी सापडला होता, ज्याची गळा आवळून कापडी पट्टी (रस्सी) च्या सहाय्याने हत्या करण्यात आली होती. या प्रकरणी पनवेल शहर पोलीस ठाण्यात गुन्हा नोंदवण्यात आला होता. पोलीस पथकाने घटनास्थळी तपास सुरू केला असता, घटनास्थळावर सीसीटीव्ही यंत्रणा नसल्याने परिसरातील अन्य सीसीटीव्ही फुटेजचा अभ्यास करण्यात आला.

गुन्हे शाखेने जवळपास पन्नास सीसीटीव्ही कॅमेऱ्यांचे फुटेज तपासले. यामध्ये मृत व्यक्ती संशयित आरोपीसोबत वावरताना दिसून आला. पोलीस तपासानंतर आरोपी धिरज राजु वर्मा (वय 27, रा. कोळीवाडा मच्छी मार्केट, पनवेल) याला ताब्यात घेण्यात आले. आरोपीने गुन्ह्याची कबुली दिली असून पुढील तपास सुरू आहे.

या प्रकरणात पोलीस आयुक्त, नवी मुंबई श्री. मिलिंद भारंबे यांच्या मार्गदर्शनाखाली गुन्हे शाखेच्या पथकाने कौशल्यपूर्ण तपास करून आरोपीला अटक केली. आरोपीला पुढील कायदेशीर कारवाईसाठी पनवेल शहर पोलीस ठाण्याच्या ताब्यात देण्यात आले आहे.

यशस्वी कामगिरी करणारे अधिकारी

वरिष्ठ पोलीस निरीक्षक उमेश गवळी, सपोनि प्रविण फडतरे, अजित कानगुडे, अभयसिंह शिंदे आणि त्यांच्या सहकाऱ्यांनी या गुन्ह्याचा यशस्वी तपास केला.